«Türkmennebit» döwlet konserni boýunça 2026-njy ýylyň geçen alty aýynda ýeriň astyndan çykarylan «gara altynyň» möçberi 2 million 53 müň tonna golaýlady.
«Nebitgazçykaryş» trestiniň müdirlikleri boýunça hasabat döwründe bellenilen meýilnamadan daşary 155 müň 800 tonna nebit çykarylyp, tabşyryk 108,5 göterim ýerine ýetirildi.
Konserniň kenarýaka çäginde iş alyp barýan «Hazarnebit» döwlet kärhanasy boýunça meýilnamadan daşary çykarylan «gara altynyň» möçberi 1 müň 227 tonna deň boldy.
Hasabat döwründe konserniň nebitgazçykaryş müdirlikleri tarapyndan 2 milliard 454 million 626 müň kub metr tebigy gaz çykarylyp, sarp edijilere ýetirildi.
Ýanaşyk gazlaryň bol akymyny almakda «Körpeje» gaz çykaryş müdirligi, soňra bolsa «Keýmir», «Goturdepenebit» we «Gumdagnebit» nebitgazçykaryş müdirlikleri nusgalyk işleri berjaý etdiler.
Serişdelere baý bolan ýataklarda «gara altyny» çykarmakda «Keýmir» nebitgazçykaryş müdirliginde gazanylan üstünlik has-da tapawutlandy. Bu kärhana boýunça geçen hasabat döwründe önümli guýulardan alnan nebit çig malynyň möçberi 236 müň 613 tonna ýetirilip, tabşyryk 122 göterim berjaý edildi.
Geçen alty aýda gazanylan üstünlikde konserniň «Goturdebenebit» we «Ýaşyldepe» nebitgazçykaryş müdirlikleriniň hem goşantlary uludyr. Bu öňdebaryjy kärhanalarda seredilýän hasabat döwrüniň meýilnamalary degişlilikde 111 we 115 göterimden hem gowrak ýerine ýetirildi.
Geçen ýylyň degişli döwri bilen deňeşdirilende, tutuş konsern boýunça nebit çig malyny çykarmakda gazanylan ösüş depgini 101 göterime golaýlady.
Konserniň önümçilik düzümleriniň maddy-tehniki binýadynyň täze tehnikalar we desgalar bilen yzygiderli berkidilmegi hem şu günki gazanylýan üstünliklere saldamly täsirini ýetirýär.
Şu günler «Türkmennebit» döwlet konserniniň nebitçileri 2026-njy ýylda dabaraly belleniljek mukaddes Garaşsyzlygymyzyň şanly 35 ýyllyk baýramyna zähmet sowgatlary bilen barmak maksady bilen netijeli zähmet çekýärler.
