Amatly geoykdysady
ýagdaýa eýe bolan Garaşsyz Diýarymyzda esasy uglewodorod serişdeleri bolan
nebitdir gazy çykarmak, olary gaýtadan işläp, ýokary hilli harytlyk görnüşine
getirmek, önümçilige häzirki zaman tilsimatlaryny we tehnologiýalaryny
ornaşdyrmak, ulgamyň kärhanalaryny tehniki taýdan pugta enjamlaşdyrmak, täze
ýangyç geçirijilerini gurmak, ozaldan bar bolan önümçilik düzümlerini
döwrebaplaşdyrmak işleri üstünlikli alnyp barylýar. Bu ugurda ýurdumyzyň ýangyç-energetika
toplumynyň iň iri önümçilik düzümi bolan «Türkmennebit» döwlet konserniniň
Günbatar Türkmenistandaky Çeleken ýarym adasynyň gury ýer böleginde iş alyp
barýan «Galkynyşnebit» nebitgaz çykaryş müdirliginiň zähmet toparlary hem öwgä
mynasyp işleri bitirýärler.
Hazar deňziniň gündogar kenarynda ýerleşýän Çeleken ýarym adasy, bilermenleriň tassyklamagyna görä, uglewodorod çig malynyň juda köp gorlaryny öz goýnunda saklaýar. Günbatardan gündogarlygyna 40 kilometre golaý uzalyp gidýän ýarym adanyň tutýan meýdany 500 inedördül kilometre ýetýär. Çeleken — «çar» we «kän» sözlerinden emele gelip, ol «dört kän», ýa-da «dört baýlyk» (nebit, nebitdakyl, duz, boýag) diýen manyny aňladýar. Häzirki wagtda bu ýerde «Galkynyşnebit» nebitgaz çykaryş müdirliginiň hünärmenleri gaýratly zähmet çekýärler.
