«Türkmengaz» döwlet konserniniň «Türkmengazüpjünçilik» birleşiginiň «Marygazüpjünçilik» müdirliginiň etrap hem-de şäher gaz hojalyk edaralarynyň gazçylary sarp edijileri ýylyň bütin dowamynda tebigy gaz bilen bökdençsiz üpjün etmek üçin «Türkmenistan — Bitaraplygyň mekany» diýlip atlandyrylan 2020-nji ýylda-da tutanýerli zähmet çekýärler. Olar häzir «mawy ýangyjyň» köp sarp edilýän döwri bolan güýz-gyş möwsümine taýýarlyk işlerini giň gerimde alyp barýarlar.
Gaz geçirijileri, gaz paýlaýjy, gaz sazlaýjy enjamlary güýz-gyş möwsümine taýýarlamak işleri müdirligiň «Ýolötenetrapgaz» gaz hojalyk edarasynda takyk hem-de sazlaşykly guralypdyr. Edaranyň gazçylary bu işleri öz wagtynda, ýokary hilli geçirmek üçin bejeriş, abatlaýyş işlerini ýörite düzülen meýilnama laýyklykda alyp barýarlar.
