Oraza bütin musulman ymmatynyň baýramydyr. Musulman senenamasynyň dokuzynjy aýy bolan «Aýlaryň soltany» adyny alan Oraza aýy haýyr-sahawata, ynanç-ygtykatlara, ýagşy niýet-pällere, alkyş-dileglere, mähir-muhabbete, sogaplara beslenen aýdyr.
Halk arasynda «Günleriň serweri — juma, aýlaryň serweri — remezan, gijeleriň serweri – gadyr» diýlen belent düşünje bar. Gadyr gijesi Hydyr ata garaşylýan gijedir. Bu düşünje-ynanç hem Oraza aýynyň adamlar tarapyndan aýratyn hormat-sarpa eýedigini, bu aýdaky edilmeli däp-dessurlaryň parzdygyny, ediljek ýagşy işleriň jogabynyň ähli eden arzuwlarymyzyň maksat-myrady bolup gaýdyp geljekdigine bolan ynamymyzyň mizemezdigini aýan edýär.
