TNGIZT-de ýol bitumynyň häsiýetlerini gowulandyrmak boýunça Himiýa institutynyň täze oýlap tapyşy tanyşdyryldy

Türkmenbaşydaky nebiti gaýtadan işleýän zawodlar toplumynda (TNGIZT) düzüminde köp parafin saklaýan nebitden alynýan ýol bitumynyň häsiýetlerini gowulandyrmagyň usulynyň tanyşdyrylyş çäresi geçirildi.

Täze serişde Türkmenistanyň Ylymlar akademiýasynyň Himiýa instituty tarapyndan işläp taýýarlanyldy we TNGIZT-iň geljekki ösüş maksatnamasyna girizildi.

Türkmen alymlarynyň bu oýlap tapyşy ulag akymlarynyň artýandygy sebäpli gara ýollaryň asfalt-beton örtükleriniň ulanylyş häsiýetlerine bolan talaplaryň ýokarlanýandygy bilen berk baglydyr.

Institutyň işgärleri inertli gazyň gurşawynda gudrony gaýtadan işlemek arkaly ýol bitumyny almagyň tehnologiýasyny işläp düzdi. Tejribäniň dowamynda barlaghana enjamynda şepbeşikligi, temperaturanyň üýtgemegine çydamlylygy, berkligi, maýyşgaklygy boýunça ýokary ülňülere gabat gelýän galyndy bitumy alyndy.

Mundan başga-da, gudron gaýtadan işlenilende parafinler we ýaglar ýaly goşmaça önümler bölünip çykýar. Olar nebiti gaýtadan işlemegiň netijesinde alynýan beýleki önümleri öndürmek üçin çig mal hökmünde ulanylyp bilinýär.

Ýurdumyzda täze awtomobil ýollarynyň gurluşygyny nazara alsaň, ýokary hilli ýol bitumy Türkmenistanyň awtoýol kärhanalarynda uly islegden peýdalanylar.

Meňzeş täzelikler

2014