ABŞ-nyň iri nebit kompaniýasy «Chevron Corp» bäsdeş «Noble Energy Inc.» kompaniýasyny 5 mlrd dollara satyn almak hakynda ylalaşyk gazandy, diýip Reýter agentligi habar berýär.

Bellenilişi ýaly, bu geleşik koronawirus pandemiýasy başlanandan bäri, nebit pudagynda iň iri geleşik bolup biler.

Geleşik ýapylandan soň, «Noble Energy-iň» paýdarlaryna birleşen kompaniýanyň 3 göterimi degişli bolar.

Bu geleşik «Chevron» kompaniýasyna kompaniýanyň subut edilen nebit we gaz ätiýaçlyklaryny 18 göterim töweregi artdyrmaga mümkinçilik berer. «Noble» kompaniýasynda nebit we gaz ätiýaçlyklarynyň subut edlen gorlarynyň 2,05 mlrd barreli bar. Şol bir wagtda «Chevron-da» 11,1 mlrd barrel bar.

Bu geleşik «Chevronyň» ABŞ-da slanesli önümçilikde maýalaryny artdyrar we kompaniýa Ortaýerdeňziniň gündogar böleginde Lewiafan iri gas känini berer.

Reýter agentliginiň bellemegine görä, nebitiň bahalarynyň aşaklamagy köp sanly energetika kompaniýalarynyň paýnamalarynyň aşaklamagyna getirdi we aşaklamany başdan geçiren hem-de ýeterlik serişdeleri bolan kompaniýalar üçin olary elýeterli etdi.

«Chevron» birinji çärýegi 8,5 mlrd dollar möçberde pul serişdeleri bilen tamamlady. Ol 2019-njy ýylda «Anadarko» kompaniýasyny 33 mlrd dollara satyn almak barada geleşikden ýüz öwrüp, aşaklama döwründe çykdajylaryny azaldan iri nebit kompaniýalarynyň birinjisi boldy.