Uglewodorod serişdeleriniň ägirt uly gorlaryny ýurdumyzyň mundan beýläk hem ösüşiniň, halkymyzyň hal-ýagdaýynyň ýokarlandyrylmagynyň hatyrasyna ulanmak arkaly ata Watanymyzyň ykdysady kuwwatyny berkitmäge «Türkmengaz» döwlet konserniniň «Türkmengazawtomatika» müdirliginiň «Ýerastymetalgoraýyş we hil» gullugynyň Balkanabatdaky bölüminiň hünärmenleri hem öz mynasyp goşantlaryny goşmagy başarýarlar.
Hemmämiziň bilşimiz ýaly, islendik zat könelýär, ulanyş möhletiniň dolmagy bilen, goşmaça çärelerdir abatlaýyş işleriniň öz wagtynda amala aşyrylmagyny talap edýär. Bu gaz geçiriji turbalara hem degişlidir. Olaryň agramly bölegi konserniň ýurdumyzyň günbatar sebitinde iş alyp barýan «Günbatargazakdyryş» we «Balkangazüpjünçilik» müdirliklerine degişli bolup durýar. Biziň gürrüňüni edýän bölümimiz hem öz işlerini şu müdirlikler bilen baglaşylan şertnamalar esasynda amala aşyrýar.
