— Ata Watanymyzyň gülläp ösmegini gazanmak, Türkmenistany dünýäniň senagat taýdan ösen döwletleriniň hataryna çykarmak, ahyrky netijede bolsa, ilatyň hal-ýagdaýyny, ýaşaýyş-durmuş derejesini düýpli ýokarlandyrmak hormatly Prezidentimiziň parasatly syýasatynyň özenini düzýär. Şeýle il-ýurt bähbitli işe ekspedisiýamyzyň agzybir we başarjaň işgärleri ýokary ruhubelentlik bilen gatnaşýarlar hem-de gowy iş görkezijilerini gazanýarlar. Oňa üstümizdäki ýylyň geçen alty aýynda gazanylan önümçilik görkezijilerimiz hem aýdyň subutnama bolup biler.
Biziň gürrüňdeşimiz «Türkmengeologiýa» döwlet korporasiýasynyň Lebap geofizika ekspedisiýasynyň başlygy Rejepmyrat Durdyýew. Bu edara ýakyn wagtdan bäri ýolbaşçylyk edýändigine garamazdan, ol işiň abyny-tabyny kemsiz ele alypdyr, esasan-da, işgärleriň tagallalaryny, olaryň döredijilik güýjüni öňde durýan jogapkärli wezipeleri üstünlikli berjaý etmäge gönükdirmegi başarypdyr. Munuň şeýledigine baýlyk agtaryjylar bilen gürrüňdeş bolanyňda, işleriň gidişi bilen ýakyndan tanşanyňda has magat göz ýetirip bolýar.
