20-njy noýabrda Hazarüsti ulag geçelgesini ösdürmek boýunça ÝB-niň Utgaşdyryjy platformasynyň çäklerinde Türkmenistanyň, ÝB-niň, halkara maliýe düzümleriniň we diplomatik wekilhanalaryň wekilleriniň gatnaşmagynda onlaýn seminar geçirildi.
Türkmenistanyň ileri tutulýan ulag taslamalaryny we halkara hyzmatdaşlygynyň çäklerinde olary maliýeleşdirmekligiň mümkinçiliklerini maslahatlaşmak duşuşygyň esasy maksady boldy. Oňa gatnaşyjylar Hazarüsti ulag geçelgesiniň üstaşyr mümkinçiliklerini ýokarlandyrmak üçin ulag infrastrukturalaryny ösdürmäge üns berdiler.
Duşuşyga türkmen tarapyndan Ulag we kommunikasiýalar agentliginiň, “Türkmendemirýollary” agentliginiň, Döwlet gümrük gullugynyň wekilleri, şeýle hem Türkmenistanyň Brýusseldäki ilçisi Sapar Pälwanow gatnaşdy.
Seminaryň geçirilmegini Ýewropa komissiýasynyň halkara hyzmatdaşlyk boýunça Baş müdirligi, Aziýa ösüş banky we Ýewropanyň täzeleniş we ösüş banky ýaly halkara maliýe institutlary, şeýle hem Fransiýanyň Türkmenistandaky ilçisi we ýurdumyzdaky beýleki diplomatik wekilhanalar goldady didiýp, Türkmenistan Habarlar portaly habar berýär.
