Stambulyň sergi merkezinde Türkmenistanyň eksport harytlarynyň sergisi açyldy. 2-nji iýuldan 5-nji iýula çenli dowam etjek bu çäre döwlet Baştutanlarynyň işjeň goldaýan ikitaraplaýyn hyzmatdaşlygynyň ösmeginiň aýdyň beýany boldy diýip, Orient habar berýär.
Türkmenistanyň we Türkiýäniň döwlet senalarynyň ýerine ýetirilmeginden soňra, türkmen öndürijileriniň uly mümkinçiliklerini nygtap çykyşlar boldy. Serginiň ýokary tehnologiýalaryň, innowasion işläp taýýarlamalaryň we öňdebaryjy tejribäniň alyş-çalyş meýdançasy bolup hyzmat etjekdigi bellenildi.
Serginiň açylyş dabarasyna Türkiýäniň söwda ministri Ömer Bolat gatnaşdy. Ol çykyşynda iki ýurduň arasynda söwda-ykdysady gatnaşyklaryň güýçli depginde ösýändigini nygtady.
— Biziň baş maksadymyz — söwda dolanyşygynyň mukdaryny gysga wagtda 5 milliard dollara ýetirmek — diýip, ministr Bolat belledi. Ol şu ýylyň ilkinji alty aýynda Türkmenistanyň we Türkiýäniň arasyndaky haryt dolanyşygynyň takmynan 26,3% ýokarlanyp, 2,2 milliard dollara ýetendigini aýtdy. Ýylyň ahyryna çenli bu görkeziji 3 milliard dollardan geçer diýip garaşylýar.
Ministr şeýle hem ikitaraplaýyn söwdada deňagramlylygy saklamagyň we dürli görnüşli önümleriň eksportyny artdyrmagyň möhümdigini aýtdy. Bu wezipeleriň ýerine ýetirilmegi iki ýurduň Prezidentleri tarapyndan goýlan uly maksatlara ýetmäge ýardam eder.
Ömer Bolat şeýle hem 2026-njy ýylyň 13-15-njy fewralynda Aşgabatda nobatdaky Türkiýäniň eksport sergisiniň geçiriljekdigini hem mälim etdi.
Ministr gaz pudagyndaky hyzmatdaşlyk barada hem durup geçdi. Ol 2024-nji ýylyň 1-nji martynda gol çekilen “Tebigy gaz pudagynda hyzmatdaşlygy ösdürmek boýunça özara düşünişmek hakyndaky Ähtnama” we “Meýiller Jarnamasyna” aýratyn üns çekdi. Türkmenistanyň gazynyň Türkiýäniň üsti bilen Ýewropa bazaryna iberilmeginiň diňe bir ykdysady däl, eýsem strategik ähmiýetiniň hem bardygyny nygtady.
Sergide eksport üçin hödürlenýän ýokary hilli önümleriň giň toplumy görkezilýär. Olaryň arasynda senagat we oba hojalyk enjamlary we olaryň ätiýaçlyk şaýlary, gurluşyk serişdeleri, durmuş we elektron enjamlary, hojalyk harytlary hem-de dokma önümleri bar.
Bu sergi Aşgabadyň Türkiýe bilen işewür gatnaşyklary pugtalandyrmaga aýratyn ähmiýet berýändiginiň aýdyň subutnamasydyr. Ol Türkmenistanyň milli ykdysadyýetiniň ähli pudaklaryny döwrebaplaşdyrmak we diwersifikasiýalaşdyrmak ugrunda alnyp barylýan işleri, döwlet maksatnamalarynyň we innowasion taslamalaryň üstünlikli durmuşa geçirilýändigini görkezýär.
Serginiň ilkinji gününde köp sanly ikitaraplaýyn duşuşyklar geçirildi. Bu duşuşyklar Türkmenistanyň Türkiýe bilen hyzmatdaşlygynda söwda-ykdysady gatnaşyklary ösdürmegiň ileri tutulýan ugurlaryň biridigini ýene bir gezek tassyklady.
