Baýlyk çykaryjylar öňdeligi saklaýarlar
04:05 18.06.2024 14972
Ýurdumyzyň uly baýlygy bolan tebigy gazyň gazylyp alnyşyny, onuň sarp edijilere iberilişini artdyrmak ugrundaky möhüm işde «Türkmengaz» döwlet konserniniň «Lebapgazçykaryş» müdirliginiň Kükürtli liniýa önümçilik böleginiň hünärmenleri ýokary başarnyk we yhlaslylyk görkezýärler. Olaryň birleşen tagallalary arkaly üstümizdäki ýylyň tamamlanan döwri üstünliklere beslendi. Şol sebäpli bölegiň işgärleri müdirligiň öňdebaryjylary hasaplanýar.
— «Pähim-paýhas ummany Magtymguly Pyragy» ýylynyň başyndan işlerimizi sazlaşykly gurap, ýokary depgini gazandyk. Munuň üçin Malaýdaky gaz gysyjy desganyň kuwwatlyklaryndan netijeli peýdalanýarys. Şeýle-de gaz känlerindäki guýularyň önüm berijiligini ýokarlandyrmak ugrunda degerli çäreleri durmuşa geçirýäris. Zähmetsöýer we başarjaň hünärmenlerimiziň iş orunlarynda yhlasly we maksada okgunly zähmet çekmekleri netijesinde şanly ýylyň tamamlanan bäş aýynda gowy görkezijileri gazandyk — diýip, bu bölegiň başlygy Begenç Çaryýew alyp barýan işleri barada höwes bilen gürrüň berýär.
Hakykatdan-da, zähmetde taplanan ussat gazçylaryň yhlasly işlemekleri arkaly tebigy gazyň öndürilişi yzygiderli artdyrylýar. Olar tarapyndan şu ýylyň geçen döwründe gazylyp alnan harytlyk önüm 3,5 milliard kub metre golaý boldy. Munuň özi bäş aýyň meýilnamasynyň artygy bilen berjaý edilendiginden habar berýär.
Öňdebaryjy bölekde dürli kesp-kärli hünärmenleriň 450-den gowragy agzybirlik bilen zähmet çekýär. Olaryň ýokary öndürijilikli işlemekleri üçin müdirligiň ýolbaşçylygy tarapyndan amatly şertler döredilýär. Şonda zähmeti goramak we tehniki howpsuzlyk meseleleri aýratyn üns merkezinde saklanylýar. Baýlyk çykaryjylaryň işleriniň aýratynlygy bu meselä örän jogapkärli çemeleşmegi talap edýär. Bu babatda bölegiň zähmeti goramak we tehniki howpsuzlyk inženeri Berdimyrat Amanowyň edýän tagallalary tüýs ýerine düşýär. Umumy üstünlige saldamly goşant goşup, kärdeşlerine gowy görelde görkezýänleriň hatarynda Malaý gaz käniniň tehnology Öwezmyrat Durdyýew, Bagaja gaz käniniň esasy geology Arazmämmet Annamyradow, Kükürtli sehiniň gaz çykaryjy operatory Haýytmyrat Nyýazow dagynyň atlary ilkinjileriň hatarynda agzalýar.
Ýurdumyzyň ykdysadyýetinde nebitgaz toplumy möhüm hyzmaty ýerine ýetirýär. Hormatly Prezidentimiz pudagyň mümkinçiliklerini giňeltmäge, onuň maddy-tehniki binýadyny pugtalandyrmaga ýakyndan üns berýär we möhüm çözgütleri kabul edýär. Pudakda möhüm taslamalaryň üstünlikli amala aşyrylmagy ösüşleriň täze belentliklerini ynamly eýelemäge pugta esas döredýär. Malaý gaz käninde gurlan we işe girizilen kuwwatly gaz gysyjy desga bu babatda ynandyryjylykly mysallaryň biridir. Häzirki döwürde döwrebap desganyň ýokary sazlaşykly işledilmegi üpjün edilýär. Şonuň netijesinde Malaý — Bagtyýarlyk ýokary basyşly gaz geçirijisine berilýän tebigy gazyň möçberleri barha artdyrylýar. Bu harytlyk önümiň bir bölegi welaýatdaky kuwwatly senagat kärhanalaryna hem-de ilatly ýerlere, esasy bölegi bolsa dostana Hytaý döwletine akdyrylýar.
Döräp biläýjek bökdençlikleriň aradan aýrylmagy, işleriň geljegi nazarlap ýola goýulmagy gaz akymynyň kadaly bolmagyny üpjün edýär. Şeýle-de ýylyň başyndan Malaý käninde we oňa ýanaşyk meýdançalarda gözleg-barlag guýularyny burawlamak işleriniň giňden ýaýbaňlandyrylmagy geljekde tebigy gazyň gorlarynyň üstüni ygtybarly ýetirmäge mümkinçilik berer.
Ýurdumyzyň ösüşlerine mynasyp goşant goşmagy maksat edinýän bölegiň başarjaň baýlyk çykaryjylary gaýrata galyp zähmet çekýärler. Tamamlanýan her bir iş gününde gazanylýan ýokary önümçilik görkezijileri bolsa olaryň üstümizdäki ýyly hem şowlulyklara beslejekdiklerinden habar berýär.
Mämmetgylyç KÜTIÝEW
Maksada okgunly işler
«Daşoguzgazüpjünçilik» müdirliginiň «Daşoguzşähergaz» gaz hojalyk edarasynyň gazçylary welaýat merkeziniň ilatyny we edara-kärhanalaryny gymmatly «mawy ýangyç» bilen üpjün etmekde «Arkadag Serdarly bagtyýar ýaşlar ýylynyň» her bir iş gününi zähmet rowaçlyklaryna besleýärler. Munuň şeýledigine müdirligiň işçi-hünärmenleri tarapyndan şu ýylyň ilkinji aýynyň üstünlikli jemlenmegi hem doly güwä geçýär.
«Mawy ýangyç» — ojaklaryň höziri
Indi onlarça ýyldan bäri bagtyýar ildeşlerimiz gyşyn-ýazyn türkmen topragyndan alynýan «mawy ýangyjyň» hözirini görüp gelýär. Şol bir wagtyň özünde-de täze döreýän obalara, şäherçelerdir şäherlere gaz geçirijiler çekilýär.
Zähmet gadamy batlanýar
«Türkmengaz» döwlet konserniniň gazçylarynyň ýurdumyzyň sebitleriniň çäklerinde ýerleşýän gaz känleriniň ulanyş guýularyny burawlap, «mawy ýangyjyň» akymyny almak ugrundaky netijeli işlerinde konserniň beýleki edara-kärhanalarynyň işgärleri bilen birlikde, Ulaglar müdirliginiň hünärmenleridir işçileriniň hem goşantlarynyň saldamlydygyny aýtmak gerek. Kärhananyň işgärleri konserniň edara-kärhanalaryna buýurmalar esasynda ulag hyzmatlaryny öz wagtynda bökdençsiz ýerine ýetirýärler.
«Mawy ýangyç» bilen bökdençsiz üpjün edilýär
Hormatly Prezidentimiziň amala aşyrýan il-ýurt bähbitli tutumlaryndan ruhlanýan Balkan welaýatynyň edara-kärhanalarynyň zähmet toparlary hem şu günler hemişelik Bitaraplygymyzyň 30 ýyllyk şanly senesiniň dabaraly belleniljek Halkara parahatçylyk we ynanyşmak ýylyny üstünliklere beslemegi maksat edinip, has-da gaýratly zähmet çekýärler.
Zawodlar toplumynyň täze önümi
Türkmenbaşydaky nebiti gaýtadan işleýän zawodlar toplumyny ösdürmegiň esasy ugurlary oňa täze tehnologiýalary ornaşdyrmakdan, öndürilýän önümleriň görnüşlerini we hilini ýokarlandyryp, bäsdeşlige ukyplylygyny artdyrmakdan hem-de dünýäniň ösen ölçeglerine gabat getirmekden, şeýle-de daşky gurşawy goramaga we ekologiýany arassa saklamaga gönükdirilen halkara talaplaryny doly kanagatlandyrmakdan ybaratdyr.