Türkmenistan iri möçberli energetika taslamalarynyň amala aşyrylmagyna halkara maýadarlarynyň gatnaşmagyny hoşallyk bilen garşylaýar diýip, Türkmenistanyň Prezidentiniň nebitgaz meseleleri boýunça geňeşçisi Aşyrguly Begliýew «Türkmenistanyň nebiti we gazy – OGT 2025» atly 30-njy halkara maslahatynyň we sergisiniň umumy mejlisinde çykyş edip belledi.

«Biziň ýurdumyz hemişelik bitaraplyk syýasatyna hem-de “Açyk gapylar” ykdysady strategiýasyna esaslanyp, maksadymyzy paýlaşýan ähli hyzmatdaşlar bilen netijeli hyzmatdaşlyga taýýardyr. Häzirki dünýä diňe tizligi we innowasiýany däl, eýsem hyzmatdaşlygyň täze etikasyny — özara hormatyň bir taraplaýyn peýdadan üstün çykýan ulgamyny talap edýär» diýip, Begliýew nygtady.

«Biz ygtybarlylyk, innowasion çemeleşme we durnuklylyk ýörelgelerini paýlaşýan her bir hyzmatdaş üçin açyk. Bilelikde biz Türkmenistanyň ägirt uly energetika mümkinçiliklerini we tebigy gazyny parahatçylygyň, gülläp ösüşiň we durnukly ösüşiň hakyky çeşmesine öwrüp bileris. Türkmenistana maýa goýuň — bilelikde döredýän geljegimize maýa goýuň» diýip, Türkmenistanyň Prezidentiniň geňeşçisi aýtdy.

Ol şeýle hem «maslahatda taýýarlanylan netijeleriň we teklipleriň dünýäde energetika howpsuzlygyny berkitmäge, arassa, ygtybarly we durnukly energiýa çeşmelerine elýeterliligi giňeltmäge hyzmat etjekdigine ynam bildirýändigini» aýtdy.

Begliýewiň bellemegine görä, «üç onýyllygyň dowamynda bu forum energetika boýunça öňdebaryjy gepleşik meýdançasy bolup, Türkmenistany dünýäniň dürli künjeklerindäki hyzmatdaşlary bilen baglanyşdyrýar».

«Häzirki wagtda dünýä energetika geçişi depginini artdyrýan mahaly, innowasiýalar, hyzmatdaşlyk we ygtybarlylyk mundan beýläk hem möhüm ähmiýete eýe bolýar. Geosyýasy we makroykdysady näbellilikleriň ösmegi, şeýle hem energiýa serişdelerine bolan islegiň ýokarlanmagy şertlerinde energetika howpsuzlygy meselesi halkara gün tertibiniň öň hataryna çykýar» diýip, ol belledi.

«Türkmenistanyň Prezidenti Serdar Berdimuhamedow milli, sebit we ählumumy energetika howpsuzlygynyň meselelerine aýratyn üns berýär we bu ugurda öňe sürlen pikirleri anyk çäreler we çözgütler arkaly durmuşa geçirýär» diýip, ol dowam etdi.

«Türkmen halkynyň Milli Lideri, Halk Maslahatynyň Başlygy Gahryman Arkadagymyz Gurbanguly Berdimuhamedow BMG-niň Baş Assambleýasynyň sessiýalarynda çykyş edip, Türkmenistanyň energetika howpsuzlygy baradaky milli garaýşyny anyk beýan etdi. Şu gün biz uly kanagatlanma bilen aýdyp bileris, Gahryman Arkadagymyz tarapyndan öňe sürlen başlangyçlar häzirki wagtda hem doly ähmiýetini saklaýar. Bu bolsa Milli Liderimiziň pähim-paýhasynyň, strategik garaýşynyň we öňdengörijiliginiň subutnamasydyr» diýip, Begliew nygtady.

«Türkmenistanyň energetika syýasaty üç esasy ýörelgä esaslanýar: energetika howpsuzlygy, ekologiýa jogapkärçiligi we halkara hyzmatdaşlygy. Şu ugurdan ugur alyp, Türkmenistan halkara energetika hyzmatdaşlygyny giňeltmek ugrunda işjeň çäreleri amala aşyrýar — däp bolan gatnaşyklary saklamak bilen bir hatarda, Ýewropada, Aziýada we Ýakyn Gündogarda täze hyzmatdaşlyk ugurlaryny açýar» diýip, Prezidentiň geňeşçisi aýtdy.

Ol «bu tagallalaryň döwletara ylalaşyklaryň we maýa goýum taslamalarynyň baglaşylmagyna, uglewodorod serişdeleriniň gözlegine, çykarylmagyna we gaýtadan işlenilmegine, şeýle hem ulag we turbageçiriji infrastrukturasy pudaklarynda hyzmatdaşlygyň ösdürilmegine» getirendigini aýtdy.

«Dünýäde tebigy gazyň subut edilen ätiýaçlyklary boýunça dördünji orunda durýan Türkmenistan, däp bolan hem-de täze bazarlarda energiýa serişdelerine artýan islegi kanagatlandyrmak bilen, sebitleýin ykdysadyýetleriň dekarbonizasiýasyna goşant goşmaga mümkinçilik berýän özboluşly orny eýeleýär. Türkmenistanyň gaz senagatyny ösdürmek boýunça milli strategiýasynyň esasyny ägirt uly “Galkynyş” käniniň özleşdirilmegi düzýär, bu ugurda işleriň ileri tutulýandygyny» Begliýew belledi.

Ol «Türkmenistanyň energiýa eksport ugurlaryny dünýä bazarlaryna ugradylmagynyň köpugurlylygyny üpjün etmäge ygrarlydygyny» hem aýtdy.

«Eksport ugurlaryny we bazarlaryny giňeltmek boýunça biziň strategiýamyz yzygiderli we meýilnama esasynda amala aşyrylýar. Biziň baş taslamamyz — Türkmenistan–Owganystan–Pakistan–Hindistan (TOPH) gaz geçirijisidir. Türkmenistan öz böleginiň gurluşygyny doly tamamlady. Owganystanda bolsa Serhetabat–Hyrat böleginiň, ýagny “Arkadagyň ak ýoly bilen” ady bilen tanalýan geçelgäniň gurluşygy başlandy. Biz TOPH taslamasynyň ähli gatnaşyjy döwletler üçin syýasy, ykdysady we durmuş taýdan peýdaly boljagyna berk ynanýarys» diýip, Begliýew aýtdy.

«Şol bir wagtyň özünde, Türkmenistan Ýakyn Gündogar we Ýewropa ugurlarynda energiýa eksportynyň täze geçelgelerini öwrenmegi dowam edýär, bu bolsa dünýä energiýa üpjünçilik ulgamynyň durnuklylygyny we çeýeligini ýokarlandyrmaga mümkinçilik berýär» diýip, Türkmenistanyň Prezidentiniň geňeşçisi aýtdy.

Ol şeýle hem «Türkmenistanyň nebitgaz pudagy üçin ileri tutulýan maýa goýum ugurlarynyň biri hökmünde Hazar deňziniň türkmen bölegindäki uglewodorod serişdelerini özleşdirmegiň möhüm orunda durýandygyny» belledi.