27-nji martda Aşgabatda Hytaý Halk Respublikasynyň Türkmenistandaky Adatdan daşary we Doly ygtyýarly ilçisi Szi Şuminiň geçiren brifinginiň esasy mowzuklarynyň biri hem iki ýurduň nebitgaz ulgamynda özara gatnaşyklarynyň geljegine bagyşlandy diýip, “Türkmenistan: Altyn asyr” neşiri habar berýär.

Şu ýyl Aşgabat we Pekin üçin taryhy ähmiýete eýedir — giň gerimli gaz hyzmatdaşlygynyň ýola goýlanyna 20 ýyl dolýar. Hytaýyň ilçisi Szi Şuminiň belleýşi ýaly, bu döwürde energetika sektory Hytaý-türkmen özara gatnaşyklarynyň esasy sütünine öwrüldi.

Sanlar Türkmenistanyň energiýa serişdeleriniň esasy üpjünçisi bolup durýandygyny tassyklaýar. 2026-njy ýylyň 1-nji martyna çenli Türkmenistanyň Hytaý Halk Respublikasyna eksport eden tebigy gazynyň möçberi 460 milliard kub metre ýetdi. Hytaý eýýäm 14 ýyl bäri yzygiderli Türkmenistanyň iň iri söwda hyzmatdaşy we türkmen «mawy ýangyjynyň» baş alyjysy statusyny saklap gelýär.

Diplomat bu hyzmatdaşlygyň özara bähbitli häsiýete eýedigini aýratyn nygtady. Hytaý üçin bu energetika howpsuzlygynyň kepili bolsa, Türkmenistan üçin durnukly býudjet girdejileri we müňlerçe täze iş orunlarynyň döredilmegidir.

Şunuň bilen birlikde, HHR-iň ilçisi bu garaýşy türkmen tarapynyň hem doly goldaýandygyny belledi. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow gaz pudagyndaky strategik bileleşigiň diňe bir iki ýurduň bähbitlerine jogap bermek bilen çäklenmän, eýsem dünýä ykdysadyýetiniň ösmeginde hem möhüm faktor bolup durýandygyny birnäçe gezek aýdypdy.

Mundan başga-da, Hytaýyň diplomatik missiýasynyň ýolbaşçysy äpet «Galkynyş» känini özleşdirmegiň dördünji tapgyry boýunça taslamanyň durmuşa geçirilmeginiň ikitaraplaýyn gatnaşyklaryň taryhynda täze sahypa boljakdygyny mälim etdi.

Degişli bäsleşigiň ýeňijisi hökmünde Hytaýyň Milli nebit-gaz korporasiýasy (CNPC) yglan edildi. Türkmenistanyň Prezidenti Serdar Berdimuhamedowyň ýakynda «Türkmengaz» döwlet konserni bilen CNPC kompaniýasynyň arasyndaky şertnamany tassyklamagy möhüm ädim boldy.

«Bu iri taslamanyň amala aşyrylmagy Türkmenistanyň gaz çykaryjy kuwwatyny has-da artdyrmaga, döwlet býujetiniň girdejilerini köpeltmäge we Türkmenistanyň ilaty üçin täze iş orunlaryny döretmäge mümkinçilik berer. Aşgabat bilen Pekiniň arasyndaky energetika gepleşikleriniň mundan beýläk-de ýokary depginler bilen ösjekdigine, tutuş sebitiň ykdysady taýdan rowaçlanmagy üçin täze gözýetimleri açjakdygyna ynanýaryn» diýip, diplomat sözüni jemledi.