Türkmenistanyň Belgiýadaky ilçisi Sapar Pälwanow Halkara nebit we gaz öndürijiler assosiasiýasynyň Ýewropa bölüminiň (IOGP Europe) dolandyryjy direktory Fransua-Rejis Muton de Lostalo bilen duşuşdy. Duşuşykda IOGP Europe bilen «Türkmengaz» döwlet konserniniň arasynda göni özara gatnaşygy ýola goýmagyň mümkinçiliklerine, şeýle hem assosiasiýada ýerleşdirilen öňdebaryjy halkara energetika kompaniýalary bilen aragatnaşyklary ösdürmäge aýratyn üns berildi. Bu barada «Türkmennebit» döwlet konserniniň resmi saýtynda habar berilýär.
Duşuşyga şeýle hem guramanyň Ýewropa energetika syýasaty boýunça wekili Enea Belardinelli gatnaşdy.
Duşuşygyň barşynda Ýewropa Bileleşiginiň energetika howpsuzlygynyň, energiýa üpjünçiliginiň çeşmelerini dürli-dürli etmegiň, energetika geçişinde tebigy gazyň ornunyň we Türkmenistanyň Ýewropa energetika jemgyýetçiligi bilen hyzmatdaşlygyny giňeltmegiň geljegi barada netijeli pikir alyşmalar boldy.
Türkmenistanyň ilçisi ýurduň ägirt uly energetika kuwwatyny, eksport ugurlaryny diwersifikasiýalaşdyrmak boýunça yzygiderli syýasatyny we ýewropaly hyzmatdaşlar bilen uzak möhletleýin, özara bähbitli hyzmatdaşlygy ösdürmäge gyzyklanmasyny bellän boldy. Türkmen tebigy gazyny Ýewropa bazaryna ibermegiň geljegine, şol sanda Hazar sebitinde energetika infrastrukturasyny ösdürmäge aýratyn üns berildi.
IOGP Europe-yň wekilleri Ýewropanyň energetika howpsuzlygyny üpjün etmek üçin energiýa serişdeleriniň üpjünçiligini dürli-dürli etmegiň möhümdigini, şeýle hem energetika geçişi şertlerinde tebigy gazyň ähmiýetiniň saklanyp galýandygyny nygtadylar.
Taraplar şeýle hem metan zyňyndylaryny azaltmak, döwrebap ekologik tehnologiýalary ornaşdyrmak we energetika pudagynyň durnukly ösüşi babatda tejribe alyşmak meselelerini ara aldylar. Bu ýagdaýda Türkmenistanyň halkara hyzmatdaşlar bilen hyzmatdaşlygy giňeltmäge we öňdebaryjy tehnologiki çözgütleri ulanmaga gyzyklanýandygy bellendi.
Söhbetdeşligiň barşynda ilçi şeýle hem Türkmenistanda geçirilen «Türkmenistanyň nebiti we gazy – 2026» (OGT 2026) nobatdaky halkara maslahatynyň we sergisiniň ähmiýeti barada habar berdi. Bu çäräniň energetika pudagynyň wajyp meseleleriniň ara alnyp maslahatlaşylýan, tejribe alşylýan we işewürlik gatnaşyklary ýola goýulýan halkara meýdançasy hökmünde ähmiýetini bellän ilçi, IOGP Europe-yň wekillerini Türkmenistanda geçiriljek indiki OGT maslahatlaryna we beýleki ugurdaş energetika çärelerine gatnaşmaga çagyrdy.
Duşuşykda şeýle hem bilelikdäki hünärmen maslahatlaşyklaryny guramagyň we Merkezi Aziýa bilen Ýewropanyň arasyndaky energetika özara baglanyşygy meseleleri boýunça gepleşikleri giňeltmegiň mümkinçiligi ara alyndy. Duşuşygyň netijeleri boýunça taraplar energetika howpsuzlygyny pugtalandyrmaga, hünär alşygyny ösdürmäge we Türkmenistanyň Ýewropa energetika jemgyýetçiligi bilen hyzmatdaşlygyny giňeltmäge gönükdirilen hyzmatdaşlygyň amaly ugurlaryny öwrenmek, aragatnaşyklary dowam etdirmek barada özara gyzyklanma bildirdiler.
IOGP Europe — Brýusselde ýerleşýän, Shell, BP, TotalEnergies, ExxonMobil, Chevron we Equinor ýaly öňdebaryjy halkara nebitgaz kompaniýalarynyň bähbitlerini görkezýän pudak assosiasiýasydyr. Gurama Ýewropa Bileleşiginiň edaralary bilen energetika howpsuzlygy, howanyň üýtgemegi syýasaty we energetika pudagyny düzgünleşdirmek meseleleri boýunça işjeň hyzmatdaşlyk edýär, nebitgaz pudagynyň bähbitlerini öňe sürmäge ýardam berýär we ÝB-niň energetika syýasatynyň esasy ugurlaryny ara almaga gatnaşýar.
