Türkmenistanyň we Özbegistanyň energetika ministrleri energetika ulgamynda hyzmatdaşlygyň geljegini maslahatlaşdylar
04:40 24.10.2024 4164
23-nji oktýabrda Aşgabatda öz işine başlan «OGT 2024» halkara maslahatynyň we sergisiniň çäklerinde Söwda-senagat edarasynyň binasynda Türkmenistanyň energetika ministri Annageldi Saparow bilen Özbegistanyň energetika ministri Jüräbek Mirzamahmudowyň arasynda duşuşyk geçirildi. Bu barada Türkmenistan Habarlar portaly habar berýär.
Duşuşykda energetika ugrundaky ikitaraplaýyn hyzmatdaşlyk meseleleri, şol sanda bilelikdäki taslamalar we özara bähbitli başlangyçlary ösdürmek mümkinçilikleri ara alnyp maslahatlaşyldy. Ministrler iki ýurduň arasyndaky gatnaşyklary pugtalandyrmagyň ähmiýetini, olaryň uglewodorod serişdelerindäki uly mümkinçiliklerini göz öňünde tutup nygtadylar.
Ministrler hyzmatdaşlygyň häzirki ugurlaryny, şol sanda tebigy gazyň üpjünçiligi, gaýtadan dikeldilýän energiýa çeşmelerini ösdürmek we innowasion tehnologiýalar bilen baglanyşykly meseleleri ara alyp maslahatlaşdylar. Taraplar gepleşikleriň dowam etdiriljekdigini we energetika ulgamlarynyň netijeliligini hem-de durnuklylygyny ýokarlandyrmagyň täze ýollaryny gözlemäge taýýarlygyny bildirdiler.
Bu duşuşyk Türkmenistanyň we Özbegistanyň energetika pudagyndaky strategik hyzmatdaşlygyny çuňlaşdyrmak üçin möhüm ädim bolup, iki ýurduň ykdysadyýetiniň durnukly ösmegine we sebitiň energetika howpsuzlygyny üpjün etmäge ýardam berer.
Özbegistanyň energetika ministri Jüräbek Mirzamahmudow OGT-2024 forumyna gatnaşmak üçin Aşgabada geldi. Ol “Ählumumy energetika bazarlarynda täze ýörelgeler we özara bähbitli hyzmatdaşlygyň geljegi” mejlisinde çykyş etjekleriň biri bolar. Bu mejlisiň çäklerinde dünýä energetika bazarynyň ýörelgeleri seljeriler, şeýle hem Türkmenistanyň bu babatdaky orny kesgitleniler. Şeýle hem bu ugur boýunça halkara hyzmatdaşlygynyň meseleleri maslahatlaşylar.
Türkmenistan we Özbegistan möhüm söwda-ykdysady hyzmatdaşlary bolup durýar. Bu ýurtlar energetika we nebitgaz pudagynda işjeň hyzmatdaşlyk edýär. Özbegistanyň çäginden Türkmenistan-Hytaý halkara gaz geçirijisi geçýär. Şeýle hem goňşy ýurt yzygiderli ýagdaýda türkmen elektrik energiýasyny satyn alýar.
Türkmenistanyň wekiliýeti Seulda ýangyç-energetika, ulag we beýleki ulgamlarda hyzmatdaşlygyň geljegini maslahatlaşýar
Türkmenistanyň Ministrler Kabinetiniň Başlygynyň Orunbasary B.Annamämmedowyň ýolbaşçylygyndaky resmi wekiliýet Koreýa Respublikasynda iş saparynda bolýar. Bu barada Türkmenistanyň DIM-i habar berdi.
Türkmenistanda nebitiň çykarylyşyny artdyrmak boýunça çäreler durmuşa geçirilýär
Prezident Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda ýurdumyzy durmuş-ykdysady taýdan ösdürmegiň meselelerine we käbir resminamalaryň taslamalaryna garaldy.
Türkmenistan maý aýynda Hytaýa gaz ibermelerini artdyrdy
Şu ýylyň maý aýynda Türkmenistan Hytaýa 2,73 mlrd kub metr tebigy gaz eksport etdi. bu 2022-nji ýylyň degişli döwri bilen deňeşdirilende 5% artykdyr. Bu barada Interfaks HHR-iň Gümrük gullugyna salgylanyp habar berýär.
Seýdiniň NGIZ-de ýarym ýylda 227 müň tonna çig mal gaýtadan işlenildi
Seýdiniň nebiti gaýtadan işleýän zawodynda 2023-nji ýylyň başky alty aýynda 227,4 müň tonnadan gowrak çig mal gaýtadan işlenildi. Şol bir wagtda önümçilik meýilnamasy 105,6% ýerine ýetirildi.
Serdar Berdimuhamedow Türkmenistanda Merkezi Aziýanyň we Aýlag ýurtlarynyň maýa goýum forumyny geçirmegi teklip etdi
Prezident Serdar Berdimuhamedow Jidde şäherinde geçirilen «Merkezi Aziýa – Aýlagdaky arap döwletleriniň hyzmatdaşlyk geňeşi» görnüşindäki Sammitinde eden çykyşynda 2024-nji ýylda Türkmenistanda Merkezi Aziýanyň we Aýlag Hyzmatdaşlyk Geňeşiniň ýurtlarynyň Birinji maýa goýum forumyny geçirmegi teklip etdi diýip, TDH agentligi habar berýär.