Türkmenistanyň dünýäde energetika ulgamyndaky ornuny has-da pugtalandyrmak, daşky gurşawy goramak bilen bagly halkara borçnamalaryna ygrarlylygyny görkezmek ugrunda amala aşyrýan işleri aýratyn bellenmäge mynasypdyr. Ýurdumyz häzirki wagtda Halkara energetika agentligi, Energiýanyň gaýtadan dikeldilýän çeşmeleri boýunça halkara agentligi (IRENA), Halkara energetika Hartiýasy, Atom energetikasy boýunça halkara agentligi (MAGATE) ýaly abraýly halkara guramalar bilen hyzmatdaşlygy ýola goýup, «ýaşyl» ykdysadyýeti ösdürmekde, energiýa serişdelerinden netijeli we howpsuz peýdalanmakda, ekologik durnuklylygy üpjün etmekde öňdebaryjy başlangyçlary öňe sürýär.

Bu hyzmatdaşlyk diňe bir döwlet derejesindäki gatnaşyklary öz içine alman, eýsem, ylym-bilim ulgamyny hem giň gerimde özünde jemleýär. Ýaş hünärmenleriň tejribesini kämilleşdirmek, olaryň dünýä tejribesinden habarly bolmagy we ekologiýa bilen bagly ylmy-barlag işlerine çekilmegi hem bu hyzmatdaşlygyň esasy ugurlarynyň biridir.

Şeýle giň halkara gatnaşyklaryň aýdyň mysaly hökmünde şu ýylyň aprel aýynyň 7 — 10-y aralygynda Slowakiýanyň Bratislawa şäherinde geçirilen halkara okuw maslahatyny görkezmek bolar. Ýewropa Bileleşiginiň «Erasmus+» maksatnamasynyň çäklerinde guralan «Merkezi Aziýada ekologiýa meselelerini, jemgyýet zerurlyklaryny we netijeli dolandyrylyşy bilim we iş üpjünçiligi ulgamlarynda birleşdirmek» atly bu okuw maslahaty öz ähmiýeti boýunça ýaş nesliň ukybyny ösdürmekde, täze pikirleri ornaşdyrmakda uly ädim boldy.

Türkmenistanyň halkara derejesindäki ekologiýa başlangyçlary we «ýaşyl» ykdysadyýet ugrunda durmuşa geçirýän işleri içerki ösüşleri gazanmak bilen çäklenmän, eýsem, ählumumy abadançylyga goşant goşmak maksadyna gönükdirilendir. Bu ugurda Türkmenistanyň öňe sürýän teklipleri we başlangyçlary halkara derejesinde giň goldawa mynasyp bolýar. Şonuň bilen birlikde, ýurdumyzyň ekologik howpsuzlygy üpjün etmek, howanyň üýtgemegi bilen baglanyşykly meseleleri çözmek boýunça BMG-niň we beýleki abraýly guramalaryň çäklerinde yzygiderli çykyş etmegi ýurdumyzyň halkara jemgyýetçiligindäki jogapkärli ornunyň nyşanydyr.

Netijede, Berkarar döwletiň täze eýýamynyň Galkynyşy döwründe Türkmenistan döwletimiz dünýäniň ykdysady, ekologiýa giňişligindäki ornuny has-da berkidýän halkara hyzmatdaşlygy üstünlikli dowam edýär. Ekologik durnuklylygy üpjün etmek, «ýaşyl» energetikany ösdürmek, ýaş nesliň dünýä derejesindäki bilim-terbiýe mümkinçiliklerini giňeltmek boýunça alnyp barylýan işler ýurdumyzyň ähli ulgamlarynda ösüşiň ygtybarly binýadydyr.

Bagtyýar GURBANBERDIÝEW,
Türkmenistanyň Içeri işler ministrliginiň institutynyň talyby.