Lebap welaýatynda Üçajy-Zerger böleginde uzynlygy 125 kilometr bolan gaz geçiriji ulanyşa girizildi. Onuň gurluşygyny bir ýylyň dowamynda «Türkmengündogarnebitgurluşyk» trestiniň bäşinji gurluşyk-gurnama müdirliginiň hünärmenleri ýerine ýetirdiler diýip, «Türkmenistan:Altyn asyr» elektron neşiri habar berýär.
Gaz geçiriji Çärjew etrabynyň çäginde hereket edýän 432 MWt kuwwatlykly gaz turbinaly elektrik bekedini «mawy ýangyç» bilen üpjün etmäge gönükdirilendir.
Häzirki wagtda kärhananyň işgärleri Gazojak şäherinde täze desganyň gurluşygyny ýerine ýetirýärler. Ol suwuklandyrylan gazy kabul etmäge we ony soňra awtomobillere we demir ýol sisternalaryna ýüklemäge mümkinçilik berer.
Şol bir wagtda kärhana Naýyp gaz käninde gaz guýularyny işläp taýýarlaýar. Ol, öz gezeginde, sebitde tebigy gazyň çykarylýan möçberini artdyrmaga kömek eder.
