«Türkmennebit» döwlet konserniniň uglewodorod çig mallaryny çykaryjylaryny tehniki-önümçilik suwlary bilen ygtybarly üpjün etmek Suw üpjünçilik müdirliginiň paýyna düşýär. Ägirt uly işleri bitirýän merdana nebitçileriň hem-de olaryň maşgalalarynyň ýaşaýan ilatly nokatlarynyň aglabasynyň arassa agyz suwuna bolan islegleri hem hut şu kärhananyň hünärmenleriniň tagallaly zähmeti bilen üpjün edilýär.
Müdirlikde şu ýylyň geçen üç aýynda nebitçilere sargytlar boýunça ýetirilen suwuň umumy möçberi 959 müň kubmetrden hem geçýär. Bu görkeziji konserniň burawlaýjylarynyň, uglewodorod çig mallaryny çykaryjylarynyň hem-de beýleki önümçilik düzümleriniň suwa bolan islegleriniň doly kanagatlandyrylýandygyny aňladýar. Kärhananyň hünärmenleri diňe bir ýerasty Ýasga kölüniň däl, eýsem, dürli ýataklardaky dik guýularyň, şeýle hem, Hazar deňziniň suwlaryny hem önümçilik maksatly işlere ýeterlik mukdarda gönükdirmegi başarýarlar.
