Toýlary toýa ulaşýan Garaşsyz, baky Bitarap döwletimizde Gahryman Arkadagymyzyň parasatly baştutanlygynda gözel paýtagtymyz Aşgabat şäherinde ýokary guramaçylyk ýagdaýynda geçirilen Türkmenistanyň Milli Geňeşiniň Halk Maslahatynyň birinji çagyrylyşynyň birinji mejlisi «Türkmenistan — parahatçylygyň we ynanyşmagyň Watany» ýylynyň möhüm ähmiýetli taryhy wakalarynyň birine öwrüldi.
Bu syýasy forumyň bagtyýar il-günümiziň hormatly Prezidentimiziň daşyna jebisleşip, mukaddes Garaşsyzlygymyzyň 30 ýyllyk, ak mermerden paýtagtymyz Aşgabat şäheriniň esaslandyrylmagynyň 140 ýyllyk şöhratly senelerine buýsançly barýan günlerinde geçirilmegi halkymyzyň toý ruhuny has-da belende galdyrdy. Bu taryhy senä gabatlanyp, paýtagtymyzda Türkmenistanyň Milli Geňeşiniň Halk Maslahatynyň Diwanynyň açylmagy hem-de ol ýerde Türkmenistanyň Milli Geňeşiniň Mejlisiniň deputatlarynyň Türkmenistanyň Milli Geňeşiniň Halk Maslahatynyň agzalary bilen bilelikde, ýagny iki palatanyň wekilleriniň gatnaşmagynda ilkinji gezek geçirilen mejlisde oňa gatnaşyjylar tarapyndan Gahryman Arkadagymyzyň Türkmenistanyň Milli Geňeşiniň Halk Maslahatynyň Başlyklygyna saýlanylmagy her bir türkmenistanlynyň buýsanjyny beýgelden waka boldy.
