«Türkmengaz» döwlet konserniniň «Marygazçykaryş» müdirliginiň Durmuş taýdan dolandyryş edarasynyň işgärleri müdirligiň «Galkynyş» gaz känindäki tebigy gazy kükürtden arassalaýan kärhanalarynda hem-de bu ýerdäki tebigy gazy toplaýjy desgalarda zähmet çekýän gazçylara ýaşaýyş-durmuş hyzmatlaryny göwnejaý gurap, olaryň önümçiligi depginli ösdürmeklerine, «mawy ýangyjyň» çykarylýan möçberlerini artdyrmaklaryna mynasyp goşant goşýarlar. Olar gaz käniniň ýanynda gurlan işçiler şäherçelerinde wahtalaýyn usulda işleýän gazçylaryň ýaşamaklary, dynç almaklary, işden boş wagtlarynda sport bilen meşgullanmaklary üçin ähli şertleri döredýärler. Kärhananyň suw, bug üpjünçilik sehiniň «Galkynyş» suw arassalaýjy desgalar toplumynyň hünärmenleri dünýä belli gaz käniniň kärhanalaryny arassa suw bilen üznüksiz üpjün edýärler.
Bu kuwwatly suw desgasy gaz känini senagat taýdan özleşdirmekligiň birinji tapgyrynyň çäginde Hytaý Halk Respublikasynyň öňdebaryjy kompaniýasynyň hünärmenleri hem-de türkmen gurluşykçylary tarapyndan gurlup işe girizildi.
