«Yug-Neftegaz Private Limited» kompaniýasy bilen Türkmenistanda nebitiň çykarylyşyny artdyrmak boýunça şertnama gol çekildi
16:25 31.10.2021 7345
27-28-nji oktýabrda Aşgabatda geçirilen «Türkmenistanyň nebiti we gazy – 2021» XXVI Halkara maslahatynyň çäklerinde «Türkmengeologiýa» döwlet korporasiýasy we «Yug-Neftegaz Private Limited» (Singapur) kompaniýasy Türkmenistanyň günbatarynda Goturdepe nebitgaz käniniň gündogar böleginde we Günorta Burun etraplarynda 3D we 2D barlaglaryny geçirmek üçin şertnama gol çekdiler.
Hünärmenleriň bahalandyrmalaryna görä, bu şertnama uglewodorodlaryň geologiýa gorlaryny artdyrmaga we ýurtda nebit çykarylyşyny ýokarlandyrmaga gönükdirilendir. Bu bolsa, öz gezeginde, daşary ýurt kompaniýalary bilen nebitgaz ulgamynda hyzmatdaşlygy giňeltmäge mümkinçilik berer.
«Yug-Neftegaz Private Limited» kompaniýasy — Türkmenistanyň öňden gelýän hyzmatdaşy. Kompaniýa bilen üstünlikli hyzmatdaşlyk eýýäm 15 ýyl dowam edip gelýär.
2020-nji ýylda «Yug-Neftegaz Private Limited» Gündogar Goturdepe käninde 3D we 2D ölçegli gözleg-barlag işlerini geçirmek maksady bilen “Türkmengeologiýa” döwlet korporasiýasy bilen şertnama gol çekdi.
Şu ýylyň sentýabr aýynda Gurbanguly Berdimuhamedow Karara gol çekdi. Resminamada “Türkmengeologiýa” döwlet korporasiýasynyň bu kompaniýa bilen tebigy uglewodorod käniniň gündogar böleginde 3D, şeýle hem “Günorta Burun” meýdançasynda 2D gözleg-barlag işlerini ýerine ýetirmek boýunça şertnama baglaşmagy göz öňünde tutulýar.
Bu kompaniýanyň «Türkmengeologiýa» bilen gol çekişen birinji şertnamasy däl. Geçen ýyllarda Yug-Neftegaz Private Limited Goturdepe we Barsagelmez känleriniň 3D seýsmiki surat boýunça geofiziki barlag işlerini, şeýle hem Darja ýarym adasy etraplarynda 2D seýsmiki surat işlerini geçirdi.
Yug-Neftegaz Private Limited Türkmenistandaky işini 2007-nji ýylda «Türkmennebit» döwlet konserni bilen synag şertnamasyndan başlady. Onuň ýerine ýetirilmeginiň netijeleri boýunça taraplar «Türkmennebit» DK-nyň känlerinde nebit guýularynyň öndürijiligini ýokarlandyrmaklygy we düýpli abatlamaklygy göz öňünde tutýan täze şertnama gol çekdiler. 2011-nji ýyla çenli döwürde 138 sany guýu-barlaglary geçirildi, bu bolsa 270 müň tonna goşmaça nebit çykarmaga mümkinçilik berdi.
«Türkmennebit» bilen 2011-nji ýylyň maýynda baglaşylan beýleki şertnama laýyklykda, 2018-nji ýyla çenli döwürde düýpli abatlaýyş we nebit guýularynyň öndürijiligini ýokarlandyrmaga gönükdirilen işler geçirildi, şeýle hem konserniň känleriniňhereketsiz ýatan gorunyň guýularyny dikeltmek işlerini geçirdi.
2018-nji ýylyň noýabrynda Yug-Neftegaz Private Limited we «Türkmennebit» bu şertnama goşmaça ylalaşyga gol çekdiler. BU ylalaşyk onuň hereket ediş möhletini 19 ýyla çenli uzaldýar we kompaniýa tarapyndan hödürlenilýän hyzmatlaryň gerimini giňeldýär. Onuň hataryna Demirgazyk Goturdepe ýatagyndaky çuňlugy 4500-5500 m bolan 60 sany dik, ýapgyt we kese guýy girýär. 2021-nji ýylyň 1-nji martyna çenli ýagdaýa görä, şertnama boýunça 1786 operasiýa geçirildi we 2,93 mln tonnadan gowrak nebit çykaryldy.
2021-nji ýylyň 14-nji oktýabrynda Yug-Neftegaz Private Limited «Türkmennebit» DK bilen bilelikde Demirgazyk Goturdepe ýatagynda çuňlugy 4660 metr bolan №327 nebit guýusyny ulanyşa berdi, onuň debiti günde 1000 barrele deň boldy. Häzirki wagtda kompaniýa bu ýatakda ýene-de üç sany guýyny burawlamak, şeýle hem täze guýulary burawlamak üçin 3 sany buraw meýdançasyny taýýarlamak işini dowam edýär.
Türkmenistan we Ýaponiýa ykdysady hyzmatdaşlygy giňeltmegiň meselelerini maslahatlaşdylar
16-njy dekabrda Aşgabatda “Ýyldyz” otelinde Ykdysady hyzmatdaşlyk boýunça türkmen-ýapon komitetiniň 15-nji mejlisi geçirildi.
«Halkara ulag-üstaşyr geçelgeleri: özara baglanyşyklylyk we ösüş» Halkara maslahaty 18-20-nji iýulda geçiriler
18-20-nji iýulda Aşgabatda «Halkara ulag-üstaşyr geçelgeleri: özara baglanyşyklylyk we ösüş» Halkara maslahaty geçiriler. Forumyň maksady pandemiýadan soňky dikeldiş boýunça ileri tutulýan meseleleri maslahatlaşmak, halkara daşamalar ulgamynda täze şertlere uýgunlaşmak we netijeli halkara ulag-üstaşyr geçelgelerini ösdürmek bolup durýar.
Energetika hyzmatdaşlygyny ösdürmek — Azerbaýjanyň wekiliýeti bilen duşuşygyň üns merkezinde
Çarşenbe güni Türkmenistanyň Daşary işler ministrliginiň binasynda wise-premýer, Türkmenistanyň Daşary işler ministri Raşid Meredowyň Aşgabada iş sapary bilen gelen Azerbaýjan Respublikasynyň Ykdysadyýet ministri Mikail Jabbarowyň baştutanlygyndaky wekilýet bilen duşuşygynda energetika ulgamynda ikitaraplaýyn hyzmatdaşlygy ösdürmegiň mümkinçilikleri ara alnyp maslahatlaşyldy. Bu barada Türkmenistanyň daşary syýasat edarasynyň saýty habar berýär.
Türkmenistanyň DIM-niň ýolbaşçysy Eýranyň energetika ministri bilen energetika we gaz pudagynda hyzmatdaşlygy maslahatlaşdy
Türkmenistanyň Daşary işler ministrliginde Raşid Meredow bilen Eýranyň Energetika ministri Abbas Aliabadiniň arasynda geçirilen duşuşykda energetika we gaz pudaklarynda ikitaraplaýyn hyzmatdaşlygyň meseleleri maslahatlaşyldy diýip, türkmen daşary syýasat edarasynyň saýtynda habar berilýär.
Mohammed Barkindo: erkin çykaryş kuwwatlyklary taryhda iň pes ýagdaýda, syýasy çözgütler zerur
Gazylyp alynýan ýangyçdan el çekmäge çagyryşyň netijesinde pudaga doly maýa goýmazlyk zerarly 62 ýyllyk taryhyň dowamynda OPEC ýurtlarynyň erkin çykaryş kuwwatlyklary iň pes ýagdaýda, bazarda nebit ýetmezçiliginiň meselesini çözmek üçin syýasy çözgütler zerur. Bu barada OPEC-iň Baş sekretary Mohammed Barkindo 5-nji iýulda Nigeriýadan geçen maslahatyň açylyşynda eden çykyşynda belledi. Görlüp oturylsa, bu Mohammed Barkindonyň köpçüligiň öňünde iň soňky çykyşy boldy. Ol şol gün gije aradan çykdy.