“Uzynada” känindäki nobatdaky guýudan uglewodorodlaryň senagat akymy alyndy
17:36 13.02.2025 3831
«Türkmennebit» döwlet konserniniň «Nebitgazburawlaýyş» trestiniň burawlaýjylary «Uzynada» känindäki 85 belgili täze çuň guýynyň buraw we gurluşyk işleri tamamlanyp, önümçilige girizdiler. Guýynyň çuňlugy 6 müň 830 metr bolup, ondan gije-gündiziň dowamynda nebit kondensatynyň 70 tonnasy hem-de 75 müň kub metr tebigy gazyň akymy alyndy.
Uzynada käni Garaşsyzlyk ýyllarynda ýurdumyzyň nebitgaz pudagyndaky kärhanalarynyň üstünlikli we netijeli işleriniň aýdyň mysaly bolup durýar. Uzynada känindäki ilkinji gözleg guýusy 7150 metr çuňlukda 2017-nji ýylyň maý aýynda burawlanypdy. Şol wagt günlük nebit kondensatynyň 200 tonnasy we gazyň 500 müň kub metr senagat akymy alyndy.
Häzirki wagta çenli Uzynada käninde “Türkmennebit” döwlet konserni bilen “Türkmengeologiýa” döwlet korporasiýasynyň tagallalary bilen birnäçe gözleg we ulanyş guýulary burawlanyp, uglewodorodlaryň senagat akymlary alyndy.
Türkmen hünärmenleriň pikirine görä, Hazar deňziniň türkmen böleginiň golaýynda ýerleşýän Uzynada käniniň açylmagy we üstünlikli özleşdirilmegi kenardaky täze känleriň ýüze çykarylyş mümkinçiliklerini has-da artdyrýar. Bu bolsa geljegi uly ygtyýarly bölekleri özleşdirmekde daşary ýurt maýa goýumlaryny çekmäge mümkinçilik berýär.
Häzirki wagtda “Türkmennebit” konserniniň nebit känleri 30-dan gowrak känleri öz içine alýar we olar özleşdirmäniň dürli tapgyryndadyr. Günbatar Türkmenistanyň känleriniň özleşdirilişi olaryň geologiki gurluş aýratynlyklaryna görä, häzirki zaman tehnikalaryny we innowasion tehnologiýalary ulanmak arkaly amala aşyrylýar. Bu bolsa uglewodorodlary gözlemek üçin 7 müň metrden gowrak çuňlukdaky guýulary burawlamaga mümkinçilik berýär.
Öňden özleşdirilip gelinýän känlerden almasy kyn nebiti çykarmak, şeýle hem has çuňňur gatlaklardaky öň elýeterli bolmadyk nebit gatlaklaryny özleşdirmäge mümkinçilik döretmek üçin konserniň ähli tehnologiýa önümçilikleriniň toplumlaýyn döwrebaplaşdyrylmagy amala aşyrylýar. Bu ugurda Sсhlumberger, Yug-Neftegaz Private Limited (Singapur), Tatneft (Tatarystan, RF) we beýleki kompaniýalar bilen üstünlikli hyzmatdaşlyk alnyp barylýar.
Türkmenistanyň Ministrler Kabinetiniň 2025-nji ýylyň 7-nji fewralynda geçirilen mejlisinde habar berlişi ýaly, 2024-nji ýylyň jemi boýunça ýurdumyzda nebit öndürilişi 8 million 279,7 müň tonna bolupdyr.
“Awazada” BMG-niň Deňze çykalgasy bolmadyk ösüp barýan döwletler boýunça üçünji maslahatynyň çäreleri badalga aldy
3-nji awgustda «Awaza» milli syýahatçylyk zolagynda BMG-niň Deňze çykalgasy bolmadyk ösüp barýan döwletler boýunça üçünji maslahatynyň başlanmagy mynasybetli baýdak galdyrmak dabarasy geçirildi diýip, Türkmenistanyň DIM-nde habar berdiler.
Ulag, energetika we beýleki ugurlarda türkmen-täjik gatnaşyklarynyň meseleleri maslahatlaşyldy
Türkmenistanyň daşary işler ministriniň orunbasary Ahmet Gurbanowyň Täjigistanyň daşary işler ministri Sirojiddin Muhriddin bilen geçiren duşuşygynda ulag, energetika, ekologiýa we beýleki ugurlarda hyzmatdaşlyk meseleleri maslahatlaşyldy diýip, Türkmenistanyň DIM-inde habar berdiler.
TDHÇMB-niň söwdalarynda daşarky we içerki bazarlara nebitgaz toplumynyň önümleri ýerlenildi
Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 20-si hasaba alyndy.
Türkmenistan — kuwwatly energetika döwleti
Jemgyýetimizde sarp ediş bazary üçin düşewüntli, arzan, amatly we döwrebap bolan senagat pudaklaryna, durmuş-medeni ulgamlara, halk hojalygynyň önümçilik medeniýetine gaýtadan dikeldilýän energiýa çeşmeleriniň kuwwatly binýady çalt ornaşýar.
BMG-niň Baş sekretary halkara maslahata gatnaşmak üçin Türkmenistana geldi
3-nji awgustda Birleşen Milletler Guramasynyň Baş sekretary Antoniu Guterriş Hazaryň kenarynda geçirilýän BMG-niň Deňze çykalgasy bolmadyk ösüp barýan döwletler boýunça üçünji maslahatyna gatnaşmak maksady bilen ýurdumyza geldi diýip, TDH habar berýär.