Baýlyk çykaryjylar öňdeligi saklaýarlar
04:05 18.06.2024 14899
Ýurdumyzyň uly baýlygy bolan tebigy gazyň gazylyp alnyşyny, onuň sarp edijilere iberilişini artdyrmak ugrundaky möhüm işde «Türkmengaz» döwlet konserniniň «Lebapgazçykaryş» müdirliginiň Kükürtli liniýa önümçilik böleginiň hünärmenleri ýokary başarnyk we yhlaslylyk görkezýärler. Olaryň birleşen tagallalary arkaly üstümizdäki ýylyň tamamlanan döwri üstünliklere beslendi. Şol sebäpli bölegiň işgärleri müdirligiň öňdebaryjylary hasaplanýar.
— «Pähim-paýhas ummany Magtymguly Pyragy» ýylynyň başyndan işlerimizi sazlaşykly gurap, ýokary depgini gazandyk. Munuň üçin Malaýdaky gaz gysyjy desganyň kuwwatlyklaryndan netijeli peýdalanýarys. Şeýle-de gaz känlerindäki guýularyň önüm berijiligini ýokarlandyrmak ugrunda degerli çäreleri durmuşa geçirýäris. Zähmetsöýer we başarjaň hünärmenlerimiziň iş orunlarynda yhlasly we maksada okgunly zähmet çekmekleri netijesinde şanly ýylyň tamamlanan bäş aýynda gowy görkezijileri gazandyk — diýip, bu bölegiň başlygy Begenç Çaryýew alyp barýan işleri barada höwes bilen gürrüň berýär.
Hakykatdan-da, zähmetde taplanan ussat gazçylaryň yhlasly işlemekleri arkaly tebigy gazyň öndürilişi yzygiderli artdyrylýar. Olar tarapyndan şu ýylyň geçen döwründe gazylyp alnan harytlyk önüm 3,5 milliard kub metre golaý boldy. Munuň özi bäş aýyň meýilnamasynyň artygy bilen berjaý edilendiginden habar berýär.
Öňdebaryjy bölekde dürli kesp-kärli hünärmenleriň 450-den gowragy agzybirlik bilen zähmet çekýär. Olaryň ýokary öndürijilikli işlemekleri üçin müdirligiň ýolbaşçylygy tarapyndan amatly şertler döredilýär. Şonda zähmeti goramak we tehniki howpsuzlyk meseleleri aýratyn üns merkezinde saklanylýar. Baýlyk çykaryjylaryň işleriniň aýratynlygy bu meselä örän jogapkärli çemeleşmegi talap edýär. Bu babatda bölegiň zähmeti goramak we tehniki howpsuzlyk inženeri Berdimyrat Amanowyň edýän tagallalary tüýs ýerine düşýär. Umumy üstünlige saldamly goşant goşup, kärdeşlerine gowy görelde görkezýänleriň hatarynda Malaý gaz käniniň tehnology Öwezmyrat Durdyýew, Bagaja gaz käniniň esasy geology Arazmämmet Annamyradow, Kükürtli sehiniň gaz çykaryjy operatory Haýytmyrat Nyýazow dagynyň atlary ilkinjileriň hatarynda agzalýar.
Ýurdumyzyň ykdysadyýetinde nebitgaz toplumy möhüm hyzmaty ýerine ýetirýär. Hormatly Prezidentimiz pudagyň mümkinçiliklerini giňeltmäge, onuň maddy-tehniki binýadyny pugtalandyrmaga ýakyndan üns berýär we möhüm çözgütleri kabul edýär. Pudakda möhüm taslamalaryň üstünlikli amala aşyrylmagy ösüşleriň täze belentliklerini ynamly eýelemäge pugta esas döredýär. Malaý gaz käninde gurlan we işe girizilen kuwwatly gaz gysyjy desga bu babatda ynandyryjylykly mysallaryň biridir. Häzirki döwürde döwrebap desganyň ýokary sazlaşykly işledilmegi üpjün edilýär. Şonuň netijesinde Malaý — Bagtyýarlyk ýokary basyşly gaz geçirijisine berilýän tebigy gazyň möçberleri barha artdyrylýar. Bu harytlyk önümiň bir bölegi welaýatdaky kuwwatly senagat kärhanalaryna hem-de ilatly ýerlere, esasy bölegi bolsa dostana Hytaý döwletine akdyrylýar.
Döräp biläýjek bökdençlikleriň aradan aýrylmagy, işleriň geljegi nazarlap ýola goýulmagy gaz akymynyň kadaly bolmagyny üpjün edýär. Şeýle-de ýylyň başyndan Malaý käninde we oňa ýanaşyk meýdançalarda gözleg-barlag guýularyny burawlamak işleriniň giňden ýaýbaňlandyrylmagy geljekde tebigy gazyň gorlarynyň üstüni ygtybarly ýetirmäge mümkinçilik berer.
Ýurdumyzyň ösüşlerine mynasyp goşant goşmagy maksat edinýän bölegiň başarjaň baýlyk çykaryjylary gaýrata galyp zähmet çekýärler. Tamamlanýan her bir iş gününde gazanylýan ýokary önümçilik görkezijileri bolsa olaryň üstümizdäki ýyly hem şowlulyklara beslejekdiklerinden habar berýär.
Mämmetgylyç KÜTIÝEW
Zähmet gadamlary batlanýar
«Türkmengaz» döwlet konserniniň iri hem-de öňdebaryjy önümçilik düzümleriniň biri bolan «Marygazçykaryş» müdirliginiň gazçylary tebigy gazy çykarmak, ony gaýtadan işläp, sarp edijilere ugratmak boýunça geçen ýyl üçin bellenilen meýilnamalaýyn tabşyrygy üstünlikli berjaý etdiler. Gazanylan ýokary netijede gaz gorunyň möçberi boýunça dünýäde öňdäki orunlaryň birini eýeleýän «Galkynyş» gaz käninde zähmet çekýän edermen gazçylaryň mynasyp paýy bar.
Gidrogeologlaryň döwrebap işleri
«Türkmengeologiýa» döwlet korporasiýasynyň iň baýry hem öňdebaryjy kärhanalarynyň biri bolan «Marygidrogeologiýa» ekspedisiýasynyň hünärmenleridir işçileri şu günler Watanymyzyň hemişelik Bitaraplygynyň 30 ýyllyk şanly toýuny ýokary önümçilik görkezijileri bilen garşy almak üçin öz zähmet gadamlaryny has-da batlandyrýarlar.
Läle Begnazarowa «Nebit-gaz» gazetiniň redaksiýasynda myhmançylykda
Türkmenistanyň halk artisti Läle Begnazarowadan söz açsaň, bada-bat «Hä, «Selbinyýazy» aýdýan bagşymy?» diýilýär. Ömrüni sungata bagyş eden ynsan üçin adynyň öz gahrymany bilen bile tutulmagyndan uly lezzet barmyka?! Bu gün halk arasynda adygyp, ussatlyga ýeten bagşy zenan «Siz Arkadag, Arkadagly Gahryman Serdar», «Jan Türkmenistan», «Aşgabat», «Jan ejemden aýyrma», «Seni küýsedim» ýaly aýdymlary bilen diňleýjileriň uly söýgüsini gazandy.
Maksada okgunly işler
«Daşoguzgazüpjünçilik» müdirliginiň «Daşoguzşähergaz» gaz hojalyk edarasynyň gazçylary welaýat merkeziniň ilatyny we edara-kärhanalaryny gymmatly «mawy ýangyç» bilen üpjün etmekde «Arkadag Serdarly bagtyýar ýaşlar ýylynyň» her bir iş gününi zähmet rowaçlyklaryna besleýärler. Munuň şeýledigine müdirligiň işçi-hünärmenleri tarapyndan şu ýylyň ilkinji aýynyň üstünlikli jemlenmegi hem doly güwä geçýär.
Meniň şäherim — ikinji öýüm
Döwletimiziň okgunly ösýän döwründe Mary welaýatynyň Şatlyk şäherem giňelip, barha täze keşbe girýär. «Marygazçykaryş» müdirliginiň Ýaşaýyş jaý jemagat kontorasynyň işgärleri tarapyndan gazçylar şäherini abadanlaşdyrmak, köçeleriň gyralaryna, seýilgählerine bag nahallaryny, dürli gülleri ekmek, ýanýodalaryny döwrebaplaşdyrmak, ýaşaýjylar üçin oňaýly ýaşaýyş-durmuş şertlerini döretmek boýunça alnyp barylýan meýilnamalaýyn işler hem bellärliklidir.