Gurluşyk işleri giň gerim alýar
10:20 25.11.2021 7462
Dürli kysymly tehnikalaryň sanynyň ýyl-ýyldan artýan şertlerinde olary ýangyçdyr çalgy ýaglary bilen bökdençsiz üpjün etmek möhüm meseleleriň birine öwrülýär. Ýurdumyzda bu meseläni üstünlikli çözmek maksady bilen köptaraply işler alnyp barylýar. Kabul edilen maksatnamalaryň çäklerinde ýerlerdäki nebit önümleri kärhanalarynyň durky täzelenilýär, şeýle-de täze ýangyç guýýan beketler gurulýar.
Bu wajyp işe «Türkmennebitönümleri» baş müdirliginiň hojalyk hasaplaşygyndaky abatlaýyş-gurluşyk müdirliginiň Lebap welaýat bölüminiň gurluşykçylary işjeň gatnaşýarlar. Olar häzirki günlerde Türkmenabat nebit önümleri kärhanasynyň Zerger şahamçasynda giň gerimli gurluşyk-gurnama we durkuny täzeleýiş işlerini alyp barýarlar.
— Kärhanamyzyň Zerger şahamçasynda şu döwre çenli degişli işleriň uly toplumy ýerine ýetirildi. Gurluşykçylar dik çanlary gurnamak, olara geçirijileri çekmek we beýleki işleri üstünlikli berjaý edýärler. Işleriň ýokary hilli hem-de bellenilen möhletinde ýerine ýetirilmegi bolsa esasy talap bolup durýar — diýip, kärhananyň gurluşyk boýunça hünärmeni Batyr Joraýew gürrüň berýär.
Gurluşykçylaryň çekýän gaýratly zähmetiniň netijesinde şu döwre çenli umumy sygymy 10 müň kubmetre barabar bolan dik çanlaryň 6-synyň gurluşyk işleri tamamlandy. Bulardan başga-da, awtoulaglara niýetlenilen garažyň, ýangyna garşy göreş bölüminiň, ammaryň binalary güýçli depginde gurulýar. Ýakyn geljekde hersiniň sygymy 100 kubmetre barabar bolan dik çanlaryň ýene-de 8-sini gurmak meýilleşdirilýär. Gurluşykçylar zerur işleri gysga wagtda üstünlikli tamamlamak üçin ýokary guramaçylyk we tutanýerlilik görkezýärler.
Her bir işi talabalaýyk, gowy hil derejesinde ýerine ýetirmek hünärmenlerden ýokary başarnygy, ussatlygy talap edýär. Gurluşyk guramasynda şeýle hil sypatlaryny özünde jemleýän işgärler az däl. Olaryň bir toparyna Şöhrat Handurdyýew başarjaňlyk bilen ýolbaşçylyk edýär. Tejribeli ussa jogapkärli işlerde elektrik bilen kebşirleýjiler Ruslan Ereşowyň, Seýran Babakulyýewiň, kerpiç örüji Agamyrat Kurbanowyň, suwagçy Agamyrat Hüwjerowyň, sürüji Muzaffar Nurullaýewiň has yhlaslylyk görkezýändiklerini aýratyn belledi.
Ýeri gelende bu gurluşyk guramasynyň işgärleriniň Köýtendag nebit önümleri kärhanasynda hem durkuny täzelemek we giňeltmek işlerine girişendiklerini, Kerki etrabynyň çäginde bolsa awtoulaglara ýangyç guýýan bekedi gurýandyklaryny bellemek gerek. Gurluşykçylaryň ilimize-ýurdumyza gerekli desgalary gurup, olaryň ösüşlere hyzmat etmegini gazanmak ugrundaky agzybirlikli işleri gün-günden ilerleýär.
Türkmenistan we Ýaponiýa ykdysady hyzmatdaşlygy giňeltmegiň meselelerini maslahatlaşdylar
16-njy dekabrda Aşgabatda “Ýyldyz” otelinde Ykdysady hyzmatdaşlyk boýunça türkmen-ýapon komitetiniň 15-nji mejlisi geçirildi.
«Halkara ulag-üstaşyr geçelgeleri: özara baglanyşyklylyk we ösüş» Halkara maslahaty 18-20-nji iýulda geçiriler
18-20-nji iýulda Aşgabatda «Halkara ulag-üstaşyr geçelgeleri: özara baglanyşyklylyk we ösüş» Halkara maslahaty geçiriler. Forumyň maksady pandemiýadan soňky dikeldiş boýunça ileri tutulýan meseleleri maslahatlaşmak, halkara daşamalar ulgamynda täze şertlere uýgunlaşmak we netijeli halkara ulag-üstaşyr geçelgelerini ösdürmek bolup durýar.
Energetika hyzmatdaşlygyny ösdürmek — Azerbaýjanyň wekiliýeti bilen duşuşygyň üns merkezinde
Çarşenbe güni Türkmenistanyň Daşary işler ministrliginiň binasynda wise-premýer, Türkmenistanyň Daşary işler ministri Raşid Meredowyň Aşgabada iş sapary bilen gelen Azerbaýjan Respublikasynyň Ykdysadyýet ministri Mikail Jabbarowyň baştutanlygyndaky wekilýet bilen duşuşygynda energetika ulgamynda ikitaraplaýyn hyzmatdaşlygy ösdürmegiň mümkinçilikleri ara alnyp maslahatlaşyldy. Bu barada Türkmenistanyň daşary syýasat edarasynyň saýty habar berýär.
Türkmenistanyň DIM-niň ýolbaşçysy Eýranyň energetika ministri bilen energetika we gaz pudagynda hyzmatdaşlygy maslahatlaşdy
Türkmenistanyň Daşary işler ministrliginde Raşid Meredow bilen Eýranyň Energetika ministri Abbas Aliabadiniň arasynda geçirilen duşuşykda energetika we gaz pudaklarynda ikitaraplaýyn hyzmatdaşlygyň meseleleri maslahatlaşyldy diýip, türkmen daşary syýasat edarasynyň saýtynda habar berilýär.
Mohammed Barkindo: erkin çykaryş kuwwatlyklary taryhda iň pes ýagdaýda, syýasy çözgütler zerur
Gazylyp alynýan ýangyçdan el çekmäge çagyryşyň netijesinde pudaga doly maýa goýmazlyk zerarly 62 ýyllyk taryhyň dowamynda OPEC ýurtlarynyň erkin çykaryş kuwwatlyklary iň pes ýagdaýda, bazarda nebit ýetmezçiliginiň meselesini çözmek üçin syýasy çözgütler zerur. Bu barada OPEC-iň Baş sekretary Mohammed Barkindo 5-nji iýulda Nigeriýadan geçen maslahatyň açylyşynda eden çykyşynda belledi. Görlüp oturylsa, bu Mohammed Barkindonyň köpçüligiň öňünde iň soňky çykyşy boldy. Ol şol gün gije aradan çykdy.